കോട്ടയം: പള്സ് പോളിയോ ഇമ്യൂണൈസേന്റെ ഭാഗമായി ജില്ലയിലെ അഞ്ച് വയസിനു താഴെയുള്ള എല്ലാ കുഞ്ഞുങ്ങള്ക്കും പോളിയോ പ്രതിരോധ വാക്സിന് നല്കും.
ജില്ലാതല ഉദ്ഘാടനം 28നു രാവിലെ 10ന് കോട്ടയം ജനറല് ആശുപത്രിയില് സ്പീക്കര് തിരുവഞ്ചൂര് രാധാകൃഷ്ണന് നിര്വഹിക്കും. ജില്ലയില് അഞ്ചു വയസില് താഴെയുള്ള 85,277 കുട്ടികള്ക്ക് പോളിയോ വാക്സിന് നല്കേണ്ടതുണ്ടെന്ന് ജില്ലാ മെഡിക്കല് ഓഫീസര് ഡോ. എന്. പ്രിയ പറഞ്ഞു.
വിതരണത്തിനായി 1,218 ബൂത്തുകള് ജില്ലയില് സജ്ജമാക്കും. രാവിലെ എട്ടു മുതല് വൈകുന്നേരം അഞ്ചു വരെയാണ് തുള്ളിമരുന്ന് വിതരണം. എല്ലാ സര്ക്കാര് ആരോഗ്യകേന്ദ്രങ്ങളിലും തെരഞ്ഞെടുക്കപ്പെട്ട അങ്കണവാടികള്, വായനശാല, ക്ലബ്, റെയില്വേ സ്റ്റേഷന്, ബസ് സ്റ്റാന്ഡ് എന്നിവടങ്ങളിലും ബൂത്തുകള് പ്രവര്ത്തിക്കും.
അഞ്ചു മൊബൈല് ബൂത്തുകളും ഏര്പ്പെടുത്തും. 29, 30 തീയതികളില് വോളണ്ടിയര്മാര് ഭവന സന്ദര്ശനം നടത്തി അഞ്ചു വയസില് താഴെയുളള എല്ലാ കുട്ടികള്ക്കും പോളിയോ തുള്ളിമരുന്ന് ലഭിച്ചെന്ന് ഉറപ്പുവരുത്തും.
ഈ പ്രായവിഭാഗത്തിലുള്ള എല്ലാ കുട്ടികള്ക്കും പള്സ് പോളിയോ ദിനത്തില് തന്നെ തുള്ളിമരുന്ന് നല്കി പോളിയോ നിര്മാര്ജന യജ്ഞത്തില് പങ്കാളികളാകണമെന്ന് ജില്ലാ കളക്ടര് ചേതന്കുമാര് മീണ അറിയിച്ചു.
E-paper LOGIN
LOGIN
